پاک فوج اور پاک فضائیہ کی جہلم کےقریب مشترکہ مشقیں

راولپنڈی : جہلم میں پاک فوج اورایئرفورس کی مشترکہ جنگی مشقیں، ‏لیفٹیننٹ جنرل بلال اکبرنےبطورمہمان خصوصی تقریب میں شرکت کی۔

پاک فوج کے شعبہ تعلقات عامہ آئی ایس پی آر کے مطابق پاک فوج اور پاک فضائیہ کی مشترکہ مشقیں ہوئی جن میں روایتی فائر پاور کی صلاحیت جانچی گئی۔ سینٹرل کمانڈ کے تحت مشقیں جہلم فائرنگ رینج میں کی گئیں اور مشقوں کا مقصد فوج اور فضائیہ کی صلاحیت کو مربوط کرنا تھا۔

ان مشقوں میں جہازوں، آرٹلری، ائیر ڈیفنس، ایس ایس جی اور آرمی ایوی ایشن نے حصہ لیا۔ انفنٹری اور آرمرز نے بھی روایتی جنگ میں حملے اور دفاعی حکمت عملی کی مشق کی۔

کمانڈر سینٹرل کمانڈ لیفٹیننٹ جنرل اظہر صالح عباسی نے شرکا کو بریفنگ بھی دی۔ جبکہ چیف آف جنرل اسٹاف لیفٹیننٹ جنرل بلال اکبر اختتامی تقریب کے مہمان خصوصی تھے۔