پاکستان کا مستقبل نوجوانوں کے ہاتھوں میں ہے، آرمی چیف

راولپنڈی: آرمی چیف جنرل قمر جاوید باجوہ کا کہنا ہے کہ پاکستان کا مستقبل نوجوانوں کے ہاتھوں میں ہے۔

پاک فوج کے شعبہ تعلقات عامہ (آئی ایس پی آر ) کے مطابق آرمی چیف جنرل قمر جاوید باجوہ نے آئی ایس پی آر  ڈائریکٹوریٹ کا دورہ کیا جہاں انہوں نے آئی ایس پی آر میں انٹر شپ کرنے والے نوجوانوں سے بات چیت کی اور آئی ایس پی آر میں انٹرشپ مکمل کرنے والے نوجوان طلباءوطالبات کو مبارکباد پیش کی۔

اس موقع پر جنرل قمر جاوید باجوہ کا کہنا تھا کہ انتہا پسندی و دہشتگردی کو جڑ سے اکھاڑ نے میں نوجوانوں کا اہم کردار ہے اور ریاست انتہا پسندی و دہشت گردی کو جڑ سے اکھاڑنے کا تہیہ کیے ہوئے ہے۔ آج جنگ کی نوعیت اور کردار بدل چکے ہیں اور ہائبرڈ وار میں نوجوان اب ہمارے دشمنوں کا بڑا ہدف ہیں۔

آرمی چیف جنرل قمر جاوید باجوہ کا کہنا تھا کہ پورا اعتماد ہے کہ پاکستان کے نوجوان اپنی صلاحیتوں کو محسوس کر رہے ہیں اور نوجوان پاکستان کو امن اور ترقی کے نئے دور کی طرف لے جائیں گے۔ انہوں نے مزید کہا کہ نوجوان عزم رہیں اور ایسے تمام خطرات کو شکست دیں۔