دانیال عزیز کیخلاف توہین عدالت کیس کا فیصلہ محفوظ

اسلام آباد: سپریم کورٹ نے دانیال عزیز توہین عدالت کیس کا فیصلہ محفوظ کر لیا۔

تفصیلات کے مطابق جسٹس عظمت سعید کی سربراہی میں تین رکنی بینچ نے توہین عدالت کیس کی سماعت کی۔

پراسیکیوٹر رانا وقار نے دانیال عزیز کے خلاف دلائل میں کہا کہ عدلیہ کی تذلیل کسی صورت برداشت نہیں، تین تقاریر کے علاوہ بھی مواد موجود ہے، دانیال عزیز نے بیان دیا کہ نگران جج نے ریفرنس تیار کروائے، توہین عدات کا معاملہ عدلیہ اور ملزم کے مابین ہے لہذا عدلیہ جو مناسب سمجھے فیصلہ کرے۔

 وکیل دانیال عزیز نے دلائل میں کہا کہ دانیال عزیز عدالتی توہین کے مرتکب نہیں ہوئےعدالت عظمی ایک آئینی ادارہ ہے، جسٹس شیخ عظمت سعید نے کہا کہ دانیال عزیز پر فرد جرم عدالتی فیصلوں پر تنقید کرنے پرعائد نہیں کی، نجی ٹی وی پر چلنے والی ویڈیو کے نکات کی تردید نہیں کی گئی جب کہ اظہار رائے کی آزادی پر بھی توازن ہوتا ہے، موچی گیٹ پر جو بات کی جاتی ہے وہ پارلیمنٹ کے فلورپر نہیں ہوسکتی۔

عدالت نے فریقین کے دلائل سننے کے بعد دانیال عزیز کے خلاف توہین عدالت کیس کا فیصلہ محفوظ کرلیا۔